Ara se trata de na manifestaziun anuala (de regola la pröma domënia de messé).
Ál é indöt trëi percursc: percurs Maratona (138 km), percurs mesan (106 km) y percurs Sellaronda (55 km). .La manifestaziun passa te deplü raiuns dles Dolomites sciöche l'Alta Badia, Reba/Fodom, Ju de Pordú, Ju de Sela, Ju de Frara, Ju dl Giau, Ju de Falzares y Ju de Valparola. La Maratona dles Dolomites Enel ne se limitëia nia ma a ester na gara de rodes. Al é na manifestaziun che, tres sües iniziatives (edema dl ziclist, gara di mituns „Maratona for kids“, foliet dla manifestaziun, direta tla televijiun), ó fá conësce y valorisé le contest olache la manifestaziun vëgn tignida, chël ó dí les Dolomites, süa jënt, süa storia, tradiziuns, cultura ladina y olache l'ecosostenibilité dla manifestaziun é n conzet fondamental.
Lingaz y cultura ladina: al vëgn porvé da sensibilisé i partezipanc al lingaz ladin baié tles valades ladines che ospitëia la manifestaziun. Al vëgn porvé da adoré val' definiziun por ladin, dal inom dla manifestaziun Maratona dles Dolomites Enel, al adoré le salüt por ladin „Bun de“ y „De bi salüc“ tla corespondënza tres e-mail cun i partezipanc y ince al adoré tofles en pert por ladin sciöche „Begnodüs“ o „Bun n pro“.
Edema dl ziclist: tl'edema dan la manifestaziun vëgnel pité jites cun la roda por fá conësce le raiun dles Dolomites mo ince serades folcloristiches cun cors, musighes y grups de bal popolar dl post por ti fá conësce y valorisé la cultura locala ai partezipanc dla manifestaziun y ai acompagnadus.
Foliet dla manifestaziun: la brosciüra ne se limitëia nia a dac/informaziuns tecniches dla gara, mo al vëgn ince adoré sciöche stromënt por fá conësce y valorisé les iniziatives liades ala manifestaziun (danter chëres i proiec de benefiziënza) y le raiun olache al vëgn tigní la manifestaziun. Vigni valada, olache ál passa la manifestaziun, ciafa döes plates tl foliet, olach ales pó se prejenté.
Direta televisiva: la Maratona é le su evënt de gara de rodes a percurs lunch nazional che vëgn trasmetü daldöt tla direta televisiva sön le canal RAI dales 6.15 ales 12.00. La direta dla televijiun de feter 6 ores ne cür nia ma la gara, mo ál vëgn ince mostré contignü cultural y storich dles Dolomites y dles valades ladines, olache an ó comuniché y valorisé le bëgn dles Dolomites y dles valades ladines, süa cultura, storia y tradiziun. Vigni ediziun ospitëia deplü personaji tratan la direta televisiva, aladô dles tematiches che an á chirí fora.
La Maratona é „green“: le tema dla sostigibilité é dagnora n punt zentral dla Maratona y deache por i organisadus dla manifestaziun é la parora de sostignibilité val' de concret, vëgnel chirí, ediziun por ediziun, n ciamp nü por fá deventé la manifestaziun plü ecologica y manco impatënta por l'ambiënt. Deplü detais sön les scomenciadies por na miú gestiun dles ressurses y les mosöres che limitëia le consum d'energia é da ciafé sön la plata internet: https://www.maratona.it/it/green
La Maratona dles Dolomites é n evënt dër sintí dala comunité locala; 1500 é i volontars che fej para por ti lascé conësce le patrimone dles Dolomites ai partezipanc dla manifestaziun y a sü acompagnadus.
