La strotöra de organisaziun é metüda adöm dal presidënt Andy Varallo, dal vizepresidënt Silvio Belardi, dal‘Assemblea di assoziá, dal Consëi diretif y dal revisur di cunc. L‘Assemblea regolëia le funzionamënt intern dl‘assoziaziun y definësc les modalités di raporc cun terzi. Le Consëi diretif, metü adöm da cinch mëmbri, é partí sö te ciamps de competënza legala, finanziara, tecnica y de comunicaziun y coordinëia adöm cun le secretariat l‘evënt tratan döt l‘ann. Tl mëis dan l‘evënt él incër 300 volontars y colaboradus che se liëia al team y dëida manajé düc i aspec tecnics, logistics y de organisaziun: dala preparaziun dla pista ales zones de partënza y dl travert, dai sistems informatics ala comunicaziun, stampa, ticketing, ospitalité y tröp d‘ater. Le fin dl‘assoziaziun é chël da promöie y deslarié fora la marca Alta Badia tl monn, cun na atenziun particolara ales competiziuns de schi alpin che vëgn organisades dala FIS y dala FISI. Por arjunje chësc travert él fondamental la colaboraziun, le laur de scuadra, l‘impëgn y la pasciun: i valurs che é la fondamënta de chësc evënt tan important. Vigni ann colaborëia l‘organisaziun cun sponsors che garantësc le finanziamënt dla manifestaziun, y ciara ince ales propostes gastronomiches y ala gestiun operativa dl evënt.
