La ciasa dles uniuns da S. Ćiascian é stada fata sö ti agn 1995-1996. Ai 6 de setëmber 1996 se abina i rapresentanc dles uniuns da S. Ćiascian pur l’prüm iade tl gran salf pur mët in funziun la Ćiasa. La festa d’inauguraziun é stada fata ai 13 de lugio 1997 cun presënza dl Presidënt dla Provinzia Luis Durnwalder, dla Junta de Comun, dles delegaziuns di stüdafüch dla Val de Puster, di rapresentanc dla cultura y de düta la comunité da S. Ćiascian. Dan l’entrada dla Ćiasa l’Presidënt L. Durnwalder à sentè n lëgn (n aier) sciöche sëgn che les uniuns y la comunité da S. Ćiascian y dl Comun de Badia à śëgn na poscibilité implö pur crësce y se svilupé cun chësta bela strutüra nöia.
Cun na delibera di 3 de lugio 1997 l’cunsëi de comun batiëia la ciasa dles uniuns da S. Ćiascian cun l’inom “Ciasa Jan Batista Rinna”, personalité vita dal 1764 al 1846 y stè governadù de Gorize y sciöche rapresentant de Viena comisser de Istria, Dalmazia y Albania.
Assessur responsabl por la ćiasa dles uniuns a San Ciascian é Pescollderungg Thomas. Dötes les domandes por l’ anuzamënt dla ciasa «J.B. Rinna» é da adressè al comun de Badia – a mans de Pitscheider Lucia - o po gni menades por mail a info@comune.badia.bz.it .
